Anasiw akk d isekkilen n teqbaylit

“Win yebγan tamaziγt ad tt-yaru”

Mi negza tafyirt-agi, ssyin d acu nezmer a t-neg ? Aṭas i yebγan ad arun s teqbaylit, maca ur ufin ara ttawil swayes ara arun tamaziγt, ugur i d-ttmagaren : d agemmay neγ isekkilen unicod, neγ isekkilen yettawin taneqqiṭ ddaw-atsen : ṛ, ṣ ,ḍ , ṭ, ḥ, ẓ, neγ acapu nnig-sen : č, ğ akk d wid d-newwi seg tegrigt : γ, ε ur ten-nettaf ara deg inasiwen n tefransist, anasiw azerty ay sseqdacen di Fransa neγ di Tmurt, daγen ugur nniḍen d amutur unadi am INTERNET EXPLORER, di tmurt d wagi ay sseqdacen, ur d-ttbanen ara deg-s isekkilen unicod. Uguren-agi ğğan kra n yemdanen akken a d-inin dakken yessefk ad nekkes akk isekkilen yettawin taneqqiṭ neγ acapu, acku ulac-iten deg inasiwen QWERTY akk d AZERTY, yernu d tidet, ur yeshil ara akken ad naru taqbaylit deg uselkim !

Nezmer a nefru uguren-agi s useqdec n imuturen unadi umi semman FIREFOX akk d INTERNET EXPLORER 8, d temsulta TAHOMA, wigi ttbanen-d deg-sen akk isekkilen n igemmayen n ddunit, yernu d ilelliyen, ur ten-tettxelliṣem ara ! Maca sin-agi ẓẓayit γef tuqqniwin (connexions) ur neğhid ara. Asmel n tsekla, IMYURA.NET iga-d anasiw swayes yezmer wemdan ad yaru taqbaylit akken yessefk, maca llan wid d-yettmagaren uguren iwakken ad t-sbedden deg uselkim, daγen, asmel n tesnilsit LEXILOGOS.COM yesnulfa-d anasiw ilmend n teqbaylit, ad tkecmem γer-s, din ad tarum ayen tebγam, ssyin a t-tessersem anda tebγam. Taswaεt-a, ala allalen-a i iwejden γef tira s teqbaylit di internet, ssya d tasawent, ahat ad yili umaynut ara yefrun taluft n isekkilen akk d unasiw.

Imyura : http://www.imyura.net/

Lexilogos : http://www.lexilogos.com/clavier/tamazight_latin.htm